Foto (zufällig)

sm2010_mat_12

Safari 2006

telemark safari lötschelücke 2006

Donnstig Abe ufem Wäg ids Saaneland u äs schiffet in Ströme, wär dänkt da scho anes Dürifüehre vo so re Tour am näxsta Tag. Nödli scho, är heig schins grüens Licht gäh.

Am 4 am Morge ufstah geit nid unbedingt ring, verhange ischs ono ging, aber zmindst troche. Ds Spiez chunt churz Hektik uf, Chare für Chare trifft i ir Istellhalle, Schueh wärde montiert, Schii packt u ab i Zug, schinbar hei no e paar anderi di glichi Idee ka, dr Zug isch guet bsetzt…

Ufem Wäg gäge ds Jungfroujoch besseret sech z’Wätter zuesehends, u plötzlich gseht mu ufenes troumhafts Näbelmeer. obna acho träffe wer uf Nöldu u Familie u nacheme Rundgang düre Ischkanal, tüesi d’Schlöise uf u dr Momänt isch cho, 19 Saaneländer Telemärkler zieh los. es chuttet wi ne Moore, d’Tafele zeigt zittewies über 100 Km/h ah ! mu merkts, es blaset nus dr Schnee ids Gsicht, d’Hubi wärde über d’Ohre zoge, d’Brilli montiert.

Ubere Gletscher wärde di erste Teleböge i Schnee drückt, verbi a idrückliche Ischblöck u Spalte. Dr „Ufstieg“ abem Konkordiaplatz geit gmüetlich vorah, Nöldu übergit ab dr Hälfti d’Füehrig a Flavio. dä findet wohl, mu chämi eso nid schnäll gnueg vorwärts u zieht zünftig ah. nenei, du jungs Bürschtli, du geisch nus nid ab, di einta hänge sich a siner Färsi u gä allz, di andere nähs gmüetlicher u gnähmige sich zwüschedri no e Snäck. Uf dr Lötschelücke erwartet nus e riese Schaar vo Türeler u vor allem e super Ussicht ids Lötschetal. Dr zügig Luft het ändgültig abgstellt, hie würds scho schier heiss. mu verpflegt sech, gnähmigt sech es Wyli u churz druff wärde d’Latti wieder agschnallt u mu isch parat für ne längi Abfahrt ds Lötschetal desuss.

Mittlerwile ischs scho 2 gsi u dr Schnee würd nid je länger si eifacher ds bewältige. i ha finebitz Chnörz mit kurvne u ab u zu lege ni e parralela Schwung häre, what a shame… aber i bi nid di einzigi wo kämpft, sogar Füehrer Noldi liegt plötzlich im Schnee, da stunet also sogar d’Bea. e ungloublichi Wärmi drückt i das Tal, u bi jedem Halt stopft mu no bitz meh Gwand i Rucksack, schlussändlich fahrt mu no im Pulövi, Händsche- u Hubelos u d’Sunnecremtubi mache d’Rundi.

Ds Blatte isch dä ganz Spass scho wieder verbi u im Postouto geits richtig Goppestei. es Bierli vor dr Zugfahrt tuet allne guet u tonder, wo isch äch Brändis Kamera ? im Bus zrugg richtig Blatte..

Als Abschluss vo däm idrücklicha Tag gits im Arc-en-ciel z’Nacht u mu palavert u plagiert u stunet über di rotbruna Grinta u dä furchtbar kompliziert Chällner….

Aller guten Dinge sind 3 Versuche, d Lötschenlücke isch geschafft – merci Nöldu

Safari greenhorn Karin

Featuring Recent Posts Wordpress Widget development by YD