Foto (zufällig)

sm2010_mat_12

Safari 2003

Langsam aber sicher hei sich am Karfritig die uber 30 Telemärkler uf em Wispileparkplatz igfunde. Die wo vo Bärn si cho si die erschte gsy u die wo im Gstaad wohne die letschte, das isch ja klar! Es isch du langsam Tag worde, wo alli Schii u Rücksäck si i de verschiedene Busa verstout gsy. D’Fahrt uf Chamonix isch schnäll verbi gange u wier hei nus alli uf die bsunderigi Safari gfröit. Ds Wätter isch absolut genial gsy; stahlblaua Himmel u viel Sunneschiin. Wier hei du bimene Gaffi u Riesebaqütte-Sandwich uf ünsi Gondle gwartet; natürlich si wier nid die einzigschte Lüt gsy wo die längi Abfahrt hei wäle i Agriff näh! Die Gondelbahnfahrt isch du i zwo Statione rassig uf 3842 m uber Meer üchi gange. Da häts nus der Schnuuf nid nume wäge der dünne Luft wäle näh, nei d’Ussicht uf däm “Aiguille du Midi” isch eifach grandios gsy! Rundum hei wier e unbändigi Witsicht chöne gniesse u der “Mont Blanc” isch wunderbar verschniita gsy. Bi däm Ablick hät du der “Flachmaa” scho ds erschta Mal müsse dra gloube u es “Schnüpfi” isch och naha gsy! Wier si alli mit güter Luune u de Schiine uf em Buggel ds enga Schneewägli achi glüffe u hei nus vo Arnold Hauswirth, ünsem Bärgführer u Mike Hauswirth ds Panorama u d’Strecki la erkläre. Vor üns isch ds “Vallee Blanche” gläge u wier hei fasch nimme chone druf warte, bis wier die erschte “Telehoooschwüng” im Frühligsschnee hei chöne mache! Es isch es speziells Erläbnis gsy, eso dür nes genials Tal ds fahre u alli hei ses gnosse. Ds Telemärkle isch für die Einte es Nasewasser gsy u die Andere (eso wie niech) hei halt mängisch e chlei müsse bschisse! Nach diversne Showilage, Fotosessions u Fachsimple häts du scho bald die verdienti Mittagspouse gäh. Es isch geng e Pracht, was eso es Picknic mit sich bringt; die verschiedenschte Sorti vo Wy, Sandwichs i allne Variatione, Eier, Würscht, Frücht, Gützeni u sogar frisch ghobleta Chees si us däne Rücksäck usa cho! E gmütlichi Stimmig herrscht i däm Club zu allne Tages- u Nachtzyte u mu findet geng e Grund zum Schmunzle – emal isch es e supergigantischi Sunnebrille uf eme Chopf vo mene Mandeli oder de gits och Lüt wo im subere Schnee für ds Schmelzwasser stah u bim fötele vertriebe wärde… Ünsi Fahrt isch du uber dä genial Gletscher witer achi gange. Der Schnee isch langsam sulzig u bflotschig worde, eso dass nus fasch us de Schüh hät gschrisse! Nach 17 km Abfahrt dür ds “Vallee Blanche” si alli Gsund u Zwäg una acho u hei die letschte Stägestritta zur Bahn i Agriff gno. Da häts nus du nomal der Schweiss fürcha gjagdt u mu hät der gross Durscht müsse lösche. Mit em Zügli isch es wieder zrugg uf Chamonix gange, wo wier bi herrlicher Wärmi uf ds Terrässeli gsi gsässe. Bi Crepes u Gaffeni hei wer dä wunderschön Tag la usklinge. E paari si du no e chlei dür ds Dörfli glüffe. Ds Shoppe isch och nid ds verachte gsy u die einti oder anderi Fläsche Grappa oder Wurscht isch du im Saaneland glandet. Merci allne vielmal für die super Organisation u dä wunderschön Tag, wier wärde no lang a die Safari sinne.

 

Ganz härzlichi Grüss us Vancouver, Canada

Anita Walker

Featuring Recent Posts Wordpress Widget development by YD