Foto (zufällig)

sm2010_mat_12

Per 2001

verabschiedung per als präsi

Uensa Präsi Per, isch eis vo vier Gründigsmitglieder vo ünsem Club! Aer het zäme mit Küsu vo Gruenige, Chrigel Bircher u Thomas Ischer am 24. Jänner 1992 im Schönried dä dänkwürdig Club gründet. Die vier hei viellecht dänn no nid gsinnet, dass dä Verein acht Jahr speter die stattlichi Azahl vo über füfzg Mitglieder wird ha. Dennzumal, isch dä Sport nämlich via Amerika wieder uf Europa, i sini Wiege zruggcho. Per isch natürlich als Nordländer u Naturliebhaber (Aer tuet bekanntlich näbe sim Hobby Zahnarzt, o no Jage u Golfe) sofort Fan vo dere elegante Sportart worde.

Die erschte zwöi Jahr hets no nid mengs nüws Mitglied gä u dere Handvoll Spinner wo bi jedem Schwung d Färsere glüpft hei, het mu no ganz mitleidig uf de Pistene nahagugget. Na dis na hets du doch afe der eint u dr ander kabe, wo sich däm Schwung verschribe het.

Im Meie 94 het du Per zunere usserordentliche Generalversammlig im Hotel Steigenberger iiglade, was faktisch och die erschti GV isch gsi. Awäsend si gsi: Per, ds Nöldi, d Karin, ds Hänsi Frutschi, Hubi, Chrigel Bircher u n`iech. Underem Traktandum Protokoll isch ganz lakonisch gschtande: Wurde bis jetzt keines geführt! Ds wichtigschte Traktandum isch jedoch d durchfüerig vo dr SM im druffolgende Winter gsi. Es isch dr erscht Alass i dere Grössenornig gsi, wo dä Club underem Per het dürigfüert. Ds positiva Echo da druf vo de meischte Site het nus für d aschtrengige entschädiget.

Leider het si Bruef dr Per je lenger je meh beasprucht, sodass är ned emal me rächt isch zum freeheele cho. Nähär isch sini Frou, d Agnes Chrank worde u het viel Pfleg brucht. Das het du och amene zeihe Schwed afa a de Chräfte zehre. Dr Per het jedoch ging no gholfe das Vorstandsschiffli ds stüre, het aber scho letscht Jahr gseit, är müessi de opa mit däm Präsidenteamt ufhöre.

U jetze isches sowit, dr Per verlat nus als Präsident. Aer wird aber sicher, wenn ging är Zyt findet am telemärkle treu blibe u sicher ds eint oder andermal mit nus zäme öppis fuge. I däm Sinn lieba Per, wünsche wier dier alls Gueta, gueti Gsundheit u Merci vielmal für dini gleischteti Arbeit.

Roger Staub, im November 2000

Featuring Recent Posts Wordpress Widget development by YD