Heli-Teli 2004

Heli-Teli 2004 in Kanada

Vorewägg wälti no säge, dass i da i däm Brichtli natürli lang nid allz würde Priiiis gä, süsch hätte wer ja nümme ds plagiere…

Äbe, Mitti Märze si wer du ünser eine, Mike, Wältes, Heinz, Pidu u mini Wenigkeit, des dür uf das Kanada. Eggers Kürti, ünsa Tourguide u fuc**`n Busdriver, hei wer ja nid guet chöne la sitze da ähne. Hät ne allwäg schier glich starch planget das wer chäme, wi wier nus gfrüut hei uf das Heli-Teli.

Dr eint oder ander hät du glich gstutzet won’er i däm Calgary wit u breit kei Schniee hät gsichtet u o de Usrädeni vor Reiseleitig hät e kena richtig wälle trüwe. Nach emene churzwilige Fährti dür di kanadischi Präri si wer ds Canmore, ünser Basis für di nächschte zwö Taga gstrandet. Puder häts o da e kena kabe. Donnderinhi!

Ds Mondrischt hei wer imel du glich aafe d’Schi uspackt u Nakiska es paar Olympia-Pischti grabschet. Spitzeneggers Wättertheorie hei eismal meh e kena richtig uberzügt u glich hät e jeda ghoffet, dass es e paar Kilometer witer ähne, Birrliga heigi sölle schniie.

Dr Tag drna, ds Sunnshine, hät zwar alls andera als d’Sunne gschiene. Drfür häts, jajaaah… PUDER kabe!

Allimal Grund gnueg, ünsa Wättergott binere chlini Bösparty ds Canmore Downtown ds ehre. PS: a Gründ häts nus eigentli nie gfehlt…

Mit e paar witere Pulverböge, enere Snowpark-Session ds Lake Louise u scho schier schwäre Scheichi, isch du ünsa Roadtrip witer gange i di Pucell Mountains.

Mit söttigne Ussichti isch kemu ds wieder gsi o e tur es Glätscherwasser la ds stah im Saloon u es bitzi früheier ga ds lige. O ds “fresh meet” hät allwäg e mänga o scho meh gluschtet, aber schliessli hei wer ja guet gschpise drvor…

Am Morge isch was für ander ds Suva-Warmup mit em Franz Heinzer, für üns dr Heliflug id Purcells gsi. E so hät Betriebstemperatur vom Adrenalin scho vor em erschte Boge gstume.

All di Glätschera, Gwächti, Chrini, Wäldleni, Mashroms u Mother Earth Halfpipes hei drzue bitreit, dass wer dr Adreanlin-Pägel hei obna bhalte.

O d’Ussicht i di usinigi Bärgwält hät grad e so iglade zum ses la stoube.

Natürli hei wer hie u da o es Bitzi müesse regeneriere. Opa bimene Lunch i dr Wildnis, grad dass mu kener Grizzlis hät müesse wärre oder bim chalte Plätti zrugg ir Logde. Glägeheit, die Rundeni für Penaltis u Stürz ds begliche…

Nach vier wunderprächtige Heli-Teli Taga hei wer ünsne Haxi Wellness im Schwäfelbad u Glätscherbach gönnt, u si ds mondrischt es läschts Mal de Kanadier ga d’Häng zerfahre. Fortsätzig folgt ar Wassere 2004/05

Christoph

PS: hoffe, dass i trotz mir Abwäseheit ar GV, mine z’länge Böge u z’breite Schii im Club ufgno würde u villicht es paar “Powder 8 Fahrer” cha bekehre.

Earl, em Pilot

Ruedi, em Gaschtgäber

Gérard, our Friend

Jeff, ünsem Guide